উপলব্ধি

বহু যোজন দূৰত্ব
তোমাৰ আৰু মোৰ
অনুভৱৰ মাজত --৷
উপলব্ধি হ'ল তেতিয়া
যেতিয়া ভাৱৰীয়াৰ মুখাখন পিন্ধি
প্ৰবেশ কৰিলো
পুনৰ সেই এৰি অহা ঘাটত
নিমিষতে পালো সমাধান ৷৷

এখনি নিষিদ্ধ উপত্যকা
য'ত তোমাৰ অবাধ প্ৰবেশ
সুখৰ পম খেদি
প্ৰেমত পৰা বাৰে বাৰে ৷৷

তোমাৰ আছে এখন কবি হৃদয়
লিখা কবিতা-অকবিতা
হৃদয়বান হোৱাৰ অভিনয়ত
মূল্যহীন হৈ পৰে মানৱতা ৷৷
হৃদয় কি মূল্যহীন...?
নে তোমাৰ বাবে এগৰাকী বেশ্যা ?
যাক কিনা- বেচা কৰা বস্তুৰ দৰে
কামিজ সলোৱাৰ দৰে সলোৱা প্ৰেয়সী ।
চিনাকী যেন লগা ছবিখনে অচিনাকী ৰূপ ল'লে
জুইৰ শিখাত তপ্ত হ'ল হৃদয়
অনুভৱৰ নদীখন বৈ আহি
হঠাতে সলালে তাৰ গতি ৷

উপলব্ধি হ'ল জানা
মায়া উপজিল তোমালৈ
তোমাৰ দৰিদ্ৰ হৃদয় খনলৈ
দিলো বিসৰ্জন প্ৰেমক
এৰি থৈ অহা ঘাটতে
কুশলে থাকা তুমি
কুশলে থাকক তোমাৰ অনুভৱ --৷৷
কালচুম বিবি