বিশাল অনুৰাগ

বিদ্ৰোহদ্ৰুম 
(কবিঃ বিশাল অনুৰাগ)
বুদ্ধ,
তোমাক অনুসৰণ কৰি নেৰিলোঁ ঘৰ
জানিছিলোঁ,
বুদ্ধিদ্ৰুমৰ ছাঁত নাছিল আইৰ আঁচলৰ বা
তোমাৰ বাণীত নাতৰিল মায়া
ছায়া হোৱাৰ হেঁপাহ আছিল পিতাৰ
জন্মত সোণৰ চামুচ নাছিল মুখত
অভাৱ মোৰ জীৱনৰ আদিপাঠ
তুমি পাই বিচাৰিছিলা
মই হেৰুৱাই আঁজুৰিছোঁ
ত্যাগৰ সংজ্ঞা কি নুবুজোঁ
পেটৰ তাড়নাত পিষ্ট জীৱন
বুদ্ধ,
মোৰ ৰক্ত-ঘামেৰে গজিছে এজোপা বৃক্ষ
কি নাম দিওঁ তাৰ
কি নাম ?