মিনাক্ষী মেচ

---

ৰাধা মই বিহৰিণী

হে প্ৰাণধন কৃষ্ণ

ক্ৰমশঃ মই দহিছো

পুনঃ উজ্জ্বলি উঠিছোঁ

তোমাৰ প্ৰেমৰ শিখাত

ৰাধা মই বিৰহিণী

বিকভানু গোৱালীৰ জী

অতিন্দ্ৰীয় প্ৰেমেৰে বুৰাই

কৰিলা উন্মাদিনী,

তুমি সৰ্বস্থিত

তুমি নিয়ন্তা

তুমি বিধাতা

তুমি সৃষ্টি স্থিতিৰ আকৰ

কলংকিনি ৰাধা নামেৰে খ্যাতি

প্ৰেমৰ অম্লান অনুৰাগেৰে

মাদকতা পুৰাই

কৰিলা বিমোহিনী

শ্যামলী সেউজীয়া বৃন্দাবন,

বাঁহীৰ মূৰ্চ্ছনাৰে মোহি

শত সহস্ৰ ৰামধেনুৰ ৰঙেৰে ৰঙাই

কৰিলা তোমাৰ ৰাসলীলা,

তোমাৰ প্ৰেমত বলিয়া

ষোল্লশ গোপীৰ হৃদয়ৰ আহূতি

কেনেকৈ তেজিলা কানাই

তৃষ্ণাৰ্ত্ত প্ৰাণৰ আকুতি

হে প্ৰিয়তম,

তোমাৰ প্ৰেম মোৰ অক্ষয় বন্তি

জগতে জাননী

আমাৰ প্ৰেম হাজাৰ সূৰ্য্যৰ জ্যোতি......!

(কবিঃ মিনাক্ষী মেচ)

---